scatvids.club A LOT OF CRAP Concello do Barco : No verán, O Barco é unha festa

No verán, O Barco é unha festa

16.06.10 10:23

O concelleiro de Cultura, Eduardo Ojea, presentou o programa de actividades festivas e culturais para os próximos meses de verán, un programa que leva por título "No verán, O Barco é unha festa"

O programa comeza o 26 de xuño co VI Camiño das Covas na Vila do Castro e finaliza o 15 de setembro cos últimos actos das Festas do Cristo. Entre medias terán lugar unha serie de eventos lúdicos e festivos que veñen sendo tradiconais no verán barquense, tal é o caso da VI Baixada de Carrilanas de Viloira, a VII Feira Medieval de Tremiñá, a Festa da Barca ou a Kermesse.

No plano teatral o programa ofrece a estrea da última montaxe de Gargallada Teatro, "A abraiante vida de Braian" con dirección de Manuel Caramés que tamén é autor do texto, inspirado na célebre película dos Monty Python. Será os días 2 e 3 de xullo no Teatro Lauro Olmo cando se presente ao público do Barco.

Como novidade o programa incorpora un concerto de arpa de Manuel Vilas, incluído no festival Vía Stellae 2010. Será no Centro Comarcal ás 20h30 do xoves 15 de xullo. Outra novidade será o concerto do Jorge Ojea Quartet, o coñecido guitarrista barquense ofrecerá unha relaxante velada de blues na praza Maior o 23 de xullo a partitr das 23h30. Por outra parte o 21 de agosto (praza Maior, 22h) presentaranse en público os grupos de música xoven da localidade agrupados no colectivo AMAVA

Un clásico do verán valdeorrés é a XXVII Xornada de Folclore que xunta no Malecón cada ano grupos de distintos paises que ofrecen, baixo o patrocinio da Deputación de Ourense, unha mostra dos seus bailes e músicas.

O programa inclúe asemade convocatorias veteranas da cultura local como é a XX Semana de Cine, a partir do 20 de agosto, ou a Semana Cultural da Asociación O Mosteiro de Vilanova, na primeira semana de agosto.

O díptico que contén a programación complétase con bailes, festas tradicionais e encontros gastronómicos que xustifican o título do mesmo. 

OBarcoDeValdeorras

Nueva Ventana Xunta de Galicia
  • Rus
  • Eng