dd Concello do Barco : Visita O Barco unha representación do concello biscaíño de Ermua

Visita O Barco unha representación do concello biscaíño de Ermua

20.05.08 08:56

A próxima fin de semana visitará a nosa vila unha delegación do concello de Ermua, encabezada polo seu alcalde Carlos Totorika, devolvendo así a visita que, en maio do ano pasado, realizara a aquela vila vasca unha representación do Concello do Barco.

A delegación ermutarra manterá, a primeira hora do sábado, unha reunión con representantes do Centro Comercial Aberto, para coñecer de primeira man esta experiencia asociativa do comercio local. Ás 12 h terá lugar, no Teatro Lauro Olmo, unha recepción oficial que contará coas actuacións da Banda de Gaitas do Concello do Barco e do Orfeón Valdeorrés. A seguir a comitiva desprazarase ao Mosteiro de Xagoaza para visitar a igrexa, a adega, o mosteiro e a súa contorna.

Pola tarde continuarán o roteiro turístico cara á paraxe arqueolóxica-natural das Médulas, segundo o desexo expreso dos organizadores do intercambio. Ás 20.30 terá lugar, no Malecón, unha exhibición de deporte rural vasco que vai sorprender, sen dúbida, o numeroso público que se encontre a esas horas polo paseo. Concretamente serán dous aizkolaris (cortadores de troncos) e un harrijasotzaile (levantamento de pedras), os que realizarán para os barquenses unha demostración das súas habelencias.

Finalmente o domingo está prevista unha visita ao Santuario das Ermidas, no concello do Bolo, último acto desta visita institucional que foi organizada por Eduardo Ojea, tenente de alcalde e concelleiro de Cultura do Barco e por Félix Pol, tenente de alcalde de Ermua e natural das terras da Limia.

OBarcoDeValdeorras

Nueva Ventana Xunta de Galicia
  • Rus
  • Eng