Cine europeo para conmemorar o Día das Mulleres

04.03.08 09:50

O sábado 8 de marzo é o Día Internacional da Muller Traballadora e con tal motivo, a Concellaría de Servizos Sociais e Igualdade ofrece este xoves día 6, en colaboración co Cine Club Groucho Marx, a película Irina Palm de Sam Garbarski, ás 20.30 e ás 22.30, no Teatro Lauro Olmo e con entrada de balde.

Irina Palm é unha coprodución de Bélxica, Alemaña, Francia, Reino Unido e Luxemburgo, que foi estreada en España en decembro de 2007. Está dirixida por Sam Garbarski e interpretada por Marianne Faithfull no papel protagonista, compartindo cartel con Miki Manojlovic e Kevin Bishop, entre outros. A película conta a historia de Maggie, unha muller de mediana idade,  que debe conseguir diñeiro para pagar o tratamento médico que necesita o seu neto.

A pesar de ter esgotado os seus recursos financeiros, Maggie estórzase en animar os desesperados pais do neno, o seu fillo Tom e a súa nora Sarah. Andando por Londres ve un anuncio de “Búscase azafata” e Maggie, inxenua, entra sen pensalo nun cllub erótico. Cando se decata exactamente de que se trata, a respectable viúva da clase media fica sorprendida. Pero Maggie decide aceptar o traballo porque é un modo rápido de obter diñeiro para pagar o tratamento do pequeno Olly. Maggie é tímida e non o pasa ben en “Sexy World”, un mundo que lle queda moito máis lonxe que o traxecto en tren desde a súa respectable vila nos arredores da gran cidade. A súa enxeñosa compañeira Luisa ensínalle os trucos do oficio e nace unha sorprendente amizade entre as dúas mulleres. Miki, o dono do local, é un tipo duro e mullereiro que se abranda diante de Maggie e transfórmaa na moi demandada e lucrativa “Irina Palm”.

Maggie acaba por demostrarse a si mesma que non é tan vella nin tan inútil. Porén, a dobre vida da viúva non tarda en chamar a atención das súas amigas e veciñas. Maggie non revela o seu segredo, e menos aínda ao seu fillo. Pero é inevitable que a descubran. Deberase enfrontar ao feo rostro da hipocrisía provinciana, ademais de cuestionar a súa moral. Coa cabeza ben alta, a simpática Maggie talvez atope algo máis que o amor da súa familia...

OBarcoDeValdeorras

Nueva Ventana Xunta de Galicia
  • Rus
  • Eng