dd Concello do Barco : DECLARACIÓN INSTITUCIONAL DO CONCELLO DO BARCO SOBRE A ANUNCIADA CENTRALIZACIÓN DOS EXÁMENES TEÓRICOS DO CARNÉ DE CONDUCIR

DECLARACIÓN INSTITUCIONAL DO CONCELLO DO BARCO SOBRE A ANUNCIADA CENTRALIZACIÓN DOS EXÁMENES TEÓRICOS DO CARNÉ DE CONDUCIR

20.07.15 19:00

Reunidos os portavoces dos tres partidos con representación na Corporación do Barco de Valdeorras (PSdG-PSOE, PP e Riada Cidadá) para analizar a decisión da DGT de centralizar en Ourense os exames teóricos do carné de conducir, queremos manifestar o seguinte:

-A volta atrás nesta decisión anunciada o venres pola tarde pola DGT resulta satisfactoria polo de agora, pero consideramos necesario seguir vixiantes porque o “globo sonda” lanzado polo goberno e as formas utilizadas para iso (anuncio repentino, dun día para outro), fainos pensar que se trata dunha decisión que podería deixarse en suspenso durante un tempo, pero volver a retomarse nun futuro próximo. Hai que recordar que a primeiros dos anos 80 xa houbo unha tentativa para quitalo.

-A decisión parécenos unha agresión flagrante ao medio rural, polo que supón de retirada dun servizo que utilizan en torno a 500 persoas ao ano. De manterse esta centralización terían que trasladarse a máis de 100 quilómetros de distancia para facer unha proba que dura entre 10 e 20 minutos.

-Os criterios esgrimidos para xustificar a centralización resúltannos incomprensibles e alonxados da realidade: falar de modernización e accesibilidade, cando para os veciños de Valdeorras este feito supón un grave prexuízo de tempo, cartos e alonxamento da administración é unha contradición que os valdeorreses non podemos entender.

-Dende o Concello do Barco seguiremos a loitar para que non se perdan servizos nesta bisbarra. Xa o tivemos que facer para evitar a reforma xudicial, fixémolo para que non se privatizaran os Rexistros Civís, a defensa sanitaria, e tamén o faremos neste caso. A retirada de servizos en comarcas coma esta, alonxada da capital da provincia e cunhas comunicacións por ferrocarril e estradas moi mellorables, pode ter unhas repercusións enormes para a veciñanza. Así non se fixa poboación no rural.

-Consideramos que a DGT, coma outros organismos do goberno central, tomaron esta decisión sen pensar nas repercusións que este feito pode provocar nas poboacións e bisbarras ás que afecta a centralización dos exames. Non se falou, nin se negociou nin se valoraron os pros e as contras, senón que se comunicou, tanto ás autoescolas coma ao concello, coma un feito consumado.

-Por último, anunciamos a nosa intención de continuar vixiantes neste e noutros temas que puideran xurdir en relación aos servizos que esta bisbarra precisa, e aínda que nos mostramos dispostos a negociar con todos os organismos que sexan precisos para manter os servizos para os veciños, tamén estaremos dispostos a levar a cabo todas as medidas de presión que sexan precisas no caso de que co diálogo non se obteñan os resultados que todos desexamos.

Neste caso, se houbera unha necesidade específica, o Concello móstrase disposto a colaborar coa DGT para lograr o mantemento dos exames, do mesmo xeito que se ten feito desde hai anos para a celebración das probas nun aula do Concello na Cerámica.

OBarcoDeValdeorras

Nueva Ventana Xunta de Galicia
  • Rus
  • Eng