Il Maquinario presenta este venres Perplexo, unha comedia delirante

24.02.15 09:39

Este venres, 27 de febreiro, ás 21 horas Il Maquinario presenta Perplexo de Marius Von Mayenburg dirixido por Tito Asorey, con Melania Cruz, Fernando González, Fran Lareu e Laura Míguez. Para público adulto. As entradas á venda, 5 euros, desde unha hora antes.

Perplexo é a segunda montaxe de ilMaquinario Teatro, estreada no Teatro Principal de Ourense en Outubro de 2014. Partindo dun dos últimos textos do exitoso dramaturgo alemán Marius Von Mayenbug, a compañía constrúe unha delirante comedia sobre a dificultade de atoparnos a nós mesmos dentro desta sociedade tan vertixinosa que nos tocou vivir neste século XXI.

Gags contínuos, xiros sorpresivos de guión, transformacións de personaxes, humor surrealista e un ritmo incríble fan desta peza unha experiencia altamente gratificante para o espectador, que sairá do teatro ben seguro rindo e desfrutando, pero tamén debatíndose sobre o lugar que debemos ocupar, todos nós, nesta sociedade.

Laura e Fernando volven a casa despois das vacacións, mais ao pouco de entrar perciben nela pequenos pero estraños cambios: unha nova planta aparece na cociña, o seu gato non está por ningures e a luz está cortada por falta de pago, aínda que uns amigos da parella, Fran e Mela, quedaron ao coidado das cousas na súa ausencia. Cando esta nova parella aparece en escena a situación da un xiro, pois semella que eles son os verdadeiros e lexítimos propietarios da vivenda.

A perplexidade de Laura e Fernando ante a nova situación transfórmase en aceptación, rematando por retirarse da vivenda… de quen é realmente a casa? Quen son realmente eles? Tiveron algunha vez un gato? Cando Laura e Fernando volven aparecer na casa, fano baixo o rol do fillo e da au-pair da outra parella. A partir deste momento a peza sucederase nun continuo xogo de intercambio de roles, onde o espectador será trasladado a un vertixinoso devir de escenas onde os actores-personaxes deberán transformarse para adecuarse a unha realidade en constante cambio.

O teatro pasa a converterse nunha metáfora da nosa realidade actual, onde todos temos que impoñernos determinadas máscaras sociais para facer fronte ás novas situacións que a vida nos presenta. A cuestión é: que queda de nós mesmos ante esta vertixe de personalidades múltiples? Quen somos realmente?

A peza, na que os personaxes teñen o mesmo nome que os actores que a interpretan, xoga dun xeito audaz co teatro dentro do teatro para falar, de maneira tremendamente cómica, de temas de tanta actualidade como son a procura dunha identidade propia, a pervivencia do fascismo na nosa sociedade, as dificultades das relacións de parella, a explotación dos inmigrantes no mundo occidental e mesmo a existencia (ou non) dun poder superior que rexe as nosas vidas (chamémoslle Deus, destino, ou enerxía cósmica). Os personaxes que a habitan, presos da necesidade dun constante cambio que lles permita adaptarse ás novas situacións que a peza lles vai esixindo, faranos reflexionar sobre a arbitrariedade do universo e sobre o noso papel como seres humanos nesta sociedade que, ás veces, é tan difícil de comprender.

OBarcoDeValdeorras

Nueva Ventana Xunta de Galicia
  • Rus
  • Eng