Dr. Explosión, Deluxe, Efecto Mariposa e Treixadura no Cristo

31.08.07 14:55

As festas do Cristo terán lugar entre o 13 e o 16 de setembro. Os concertos, un cada día, estarán protagonizados por Doctor Explosión, Deluxe, Efecto Mariposa e Treixadura.

O cartel do Cristo deste ano representa unha verbena no campo da festa do Malecón. Son precisamente os bailes e verbenas os actos máis concorridos das nosas festas, xunto ao veterano Descenso do Sil, que este anos cumpre 41 anos, e os concertos que adoitan ser os preferidos pola mocidade.

Os roqueiros asturianos de Doctor Explosión ofrecerán o primeiro deles o día 13, será pola noite na praza Maior, trátase dun trío creado en 1989 e que teñen no seu haber tres discos longos e sete singels favorablemente acollidos pola crítica. Contundentes, imprevisibles e divertidos no escenario serán os encargados de abrir o telón dos recitais festivos.

Deluxe é o proxecto persoal de Xoel Gómez, un inspirado músico coruñés que compón, toca e canta as súas propias cancións. Presentará no Barco o seu último disco “Fin de un trabajo infinito” no que se inclúe “Colillas en el suelo” quizá o seu tema máis coñecido. Será o día 14 a partir das 21:00 na Praza Andrés de Prada, recinto que tamén acollerá, no mesmo horario, os outros dous concertos.

Efecto Mariposa, para moitos o concerto máis agardado, é un dos grupos en alza no momento actual do pop español, posúe tres CDs no mercado e as súas actuacións caracterízanse pola frescura e a personalidade dos temas cantados por Susana Alva, a vocalista da banda. Estarán no Barco o sábado día 15.

Treixadura, gaiteiros e orfeón, serán os encargados de pechar O Cristo con música tradicional. “Unha semaniña enteira” é o último disco dun dos grupos máis prestixiosos do folque galego. Incorpora o orfeón nos seus concertos, o que lle confire unha orixinalidade que o público do Barco saberá apreciar. Este evento conta co patrocinio da Consellaría de Cultura e Deporte.  

OBarcoDeValdeorras

Nueva Ventana Xunta de Galicia
  • Rus
  • Eng