Millarouso e Santurxo: Candís, Carreiras (A Concepción)

Igrexa de Santurxo
Igrexa de Santurxo

As entidades de poboación desta parroquia, bipolar na súa denominación oficial, suman un total de 83 habitantes, repartidos deste xeito: en Millarouso, o núcleo principal, viven 52 persoas; Candís ten 16 inscritas; en Santurxo residen 9 persoas; e finalmente As Carreiras acolle 6 habitantes. Pola súa singularidade, cómpre salientar tamén o casal e as terras do Priorado, que constitúen unha boa mostra das podentes casas herdade do medio rural galego.

O lugar de Santurxo -forma toponímica resultado da aglutinación de Sant Xurxo- garda no altar maior da súa igrexa unha ara votiva de factura romana con alusións a Baco, alcumado o “Pai Liberador”, considerada polos estudosos unha das primeiras referencias á viticultura nas terras de Valdeorras. Candís, un nome de antigas resonancias, citado nas fontes medievais como Quendiz, presenta a raíz cand-, recoñecíbel noutros topónimos cos que podería ter relación como Candeda, Cando ou A Candaira...  Dálle tamén denominación ao río que tras percorrer as terras montesías de Candeda e Domiz, entre lembranzas de antigas pontes e vellos muíños maquieiros, de pozas de augas limpísimas e abundancia de troitas pescadas “ao desamergullo”, réndelle tributo ao Sil na paraxe de idéntico nome.

O contorno de Millarouso e Santurxo é un excelente exemplo da ordenación da terra, da racionalidade no seu uso e a paisaxe na cultura tradicional: terras de labor, bacelos, lameiros, soutos e árbores froiteiras de toda caste esténdense pola ladeira e arrodean as construcións da aldea, formando un conxunto harmónico e evocador, suxestivo, coa aparencia de se erguer no medio da frondosidade. 

A parroquia celebra a súa titular, a Inmaculada Concepción, o día 8 de decembro, e mais o Santo Antonio, avogoso de mozas e mozos casadeiros, e da facenda e das cousas perdidas, o 13 de xuño. 

OBarcoDeValdeorras

Nueva Ventana Xunta de Galicia
  • Rus
  • Eng