O Castro de Valdeorras: O Corrego, Outarelo (Santa María)

Detalle do Castro de Valdeorras

O Castro, vila cabeceira da antiga xurisdición de Valdeorras, é unha localidade cargada de historia. Situada a escasos dous quilómetros do núcleo urbano do Barco, acolle na actualidade 104 habitantes, repartidos entre a propia Vila do Castro (74), O Córrego (5) e Outarelo (25). No propio núcleo do Castro salientan as edificacións do Pazo de Flórez, espléndida construción señorial datada en 1630, habilitado como establecemento hostaleiro baixo a denominación de “Pazo do Castro”, a Casa Carballo, e mais a torre da antiga fortaleza. Tamén posúe un atractivo conxunto de adegas cova para a conservación do viño, construcións adxectivas á casa labrega e propias desta bisbarra. A comezos do mes de xullo ábrense para a visita e o deleite de veciños/as e visitantes nun percorrido festeiro coñecido como “Camiño das covas”. O conxunto histórico do Castro está catalogado como Monumento Nacional por Real Decreto do 22 de abril do ano 1949.

No pequeno casal do Córrego consérvase unha ponte sobre o regueiro Forcadela, dun só arco de medio punto e feita con pedra de lousa, considerada de época romana. Entre novas edificacións e algunha construción tradicional restaurada aparecen aquí outra volta as adegas cova, como expresión da ancestral cultura vitivinícola do país.  

Outarelo expresa á perfección no topónimo a súa localización, un pequeno "outeiro" ou elevación no terreo dende o que podemos albiscar a vila do Barco con toda a forza da súa expansión urbanística polo contorno próximo. Salienta nesta aldea a romaría do San Francisco Blanco, que se celebra o día 5 de febreiro, antigamente moi concorrida por veciños de toda a comarca que acudían, e aínda hoxe acoden, fieis á cita con este santo local, avogoso das doenzas da cabeza. 

OBarcoDeValdeorras

Nueva Ventana Xunta de Galicia
  • Rus
  • Eng